kva kan ein læra av å reisa? #2

kva kan ein læra av å reisa når det gjeld

kommunikasjon og sosial framferd

reiser ein lenger enn utanfor dei næraste nabolanda våre, kan ein komma i situasjonar der ein ikkje blir forstått. engelsk kan dei fleste i noreg både snakke og forstå, men ofte blir eg forbausa over dei dårlege engelskkunnskapane til resten av europa. anten dei ikkje kan eller i mange tilfelle ikkje vil, så klarar dei ikkje å kommunisera med oss. personleg synest eg nye språk er spanande og lærer gjerne eit par nye gloser når eg er på reise. det eg har opplevd er at folk blir meir imøtekomande dersom du berre prøver å gjera deg forstått på deira eige språk. ikkje berre gå ut ifrå at den andre kan og vil snakka engelsk. lær deg enkle ting som å helsa, sei takk, bestilla mat og drikke og spørja etter rekninga. i mange av reisehandbøkene finn du dei mest vanlege frasene på språket til landet du skal reisa til.
å opptre høfleg i livet generelt må jo vera eit mål for alle, men kanskje spesielt viktig å tenkja på når ein kjem til nye stader. hugs at du er ein besøkjande. sjølvsagt vil du bli behandla bra som ein gjest, men er du høfleg og hyggeleg mot andre, er det lettare å lika deg. det same må gjelda når du som fastbuende treff turistar: gje eit smil og ei hjelpande hand dersom det trengst.